მსოფლიოს ქალების კუმირი და მამაკაცის სილამაზის ეტალონად აღიარებული ალენ დელონი საქართველოშია. ფრანგმა მსახიობმა ჟურნალისტებისთვის დღეს პრესკონფერენცია გამართა. სახელოვნებო ინდუსტრია "არტპალასის" ოფისში მისულმა ალენ დელონმა წითელ ხალიჩაზე გაიარა, ათობით გულშემატკივრის გარემოცვაში, რომელთა შორისაც ახალგაზრდა გოგონები ჭარბობდნენ.

პრესკონფერენციაზე შესულმა ალენ დელონმა წინა რიგში მჯდომი გოგონა - რადიო "იმედის" ჟურნალისტი გვანცა გიორგობიანი წამოაყენა და ლოყაზე აკოცა.

ფრანგი მსახიობი საქართველოში დღეს დილით ჩამოვიდა. ალენ დელონი ხვალ სპორტის სასახლეში პაატა ბურჭულაძის 60 წლის იუბილესადმი მიძღვნილ კონცერტს გაუძღვება.